LA GUARDIA

¡Vaiti con Dios, compañero!

y descansa lo que pueas,

que poco tiempo te quea pa que s´acabi el recreo

y p´aquí otra vez te veas tan enclaustrao com´un reo

y endispuestu a la tarea.

¡Ay que coño, hay que joelsi!

Otra vez aquí enel taju

y p´aguantal el caraju, d´esti vaina que le dueli

p´aquí arriba, p´allí abaju

y se le metin los malis, por mediu los calcañalis

y le rodean la verija,

enel oju l´hacin “rija”

y l´arreguña las cervicalis.

Y la otra qu´ha creiu

qu´el su chiquino ha llorau

y no sabi si es de friu

o es pol que sá cagau

y p´aquí se lo ha traiu.

Tieni mandanga esti oficio

qu´alguno penso un güen día

pa´hayudal con la ciencia

y no con las letanías

¡Y mira pa qu´hemus queao!

pa rubricá en los papelis

que si a esti p´aquí le dueli

sa ha de queal sentao,

sin arrimalsi al trabajo,

y seguil con el “bandajo”,

como si fuese “quebrao”.

Y ahora uno que le dueli la napia y la garganta

y otro al que le pica el codo

no de ayel, d´antiel tampoco,

sino d´anti de Semana Santa.

Y esi que cree que tiene

argu malu en la cabeza

que se l´abri la boca

a cada vez que bosteza.

Y aquel otro qu´ha tres años, cuando casara a la hija

en el baili de la boda

se l´ansomo a la “verija”

un a modo d´una “bola”.

Y esta tardi s´acordao, qu´el burto allí lo tenía

y en Urgencias sa espetao

pa ve que le ician,

qu´antis no l´había vagao.

Y pa remate la gorda, que hoy le doeli la roilla

cuandu ella de moza andaba

y daba la “compailla”

y pa ná le molestaba.

¡Cago´ntal, que desespero, qu´impotencia

y que jartura!

por no perdé la pacencia

anti tanta “zumbaura”.

Pero en estas qu`ahora suena

a lo lejos, el sonío

del otr´hora temío

quejío d´una sirena.

Y el corazón s´acelera

y se te tensa la nuca,

y se te hace la espera

más larga y transía que nunca.

Ya entra corriendu el hijo

que a la madre acompaña,

y que te cuenta y te ici

que ¡tan güena como´staba!

S´a pusío amoratá,

con las manos enel pecho

y asina s´había queao

baldía, com´un barbecho.

Y llegando ya pa Cácris, cuando la puerta s´veia

del hospital-sanatorio

s´a queao mu quieta y blanca

como su hermano Sartorio la noche en que se moría.

Yo la miro y a mi me paice

que mesmo miro una carpa

que boquea en l´agonía

cuando s´arrima “la parca”.

Antonci, en un estanti,

se m´estremeci el semblanti,

se me j´encrespan los pelos,

se m´evapora el “canguelo”

y empiezu a agilá p´alanti.

Veo que se l´escapa la via

y qu´aparece la guaña

de esa siniestra sombra que me reta cada día,

cada guardia, en la j´entrañas.

Y me pongo a cavilá ¿Qué le pongo?, ¿Qué le hago?

¿Qué le meto por las venas?

pa qu´espanti de esi cuerpo

a la que lo´yela y seca.

Pasan ya mas de la j´onci

y a las cuatro había venío,

si enun ratu no se muevi

será qu´esque s´a morío.

¡Ya paice que revivi!

y hasta paice vel sonreío

Ya la “oscura” s´encabrita

por que l´habemus vencío.

Y´estoy janchu que revientu

¡¡ya te gané otra partía!!

Ya vendrás por la revancha

¡Pero esu, será otro día!

qu´hoy la guardia s´acabao

y yo ya estoy de “salía”.

Ahí te queas compañero,

con los vainas y pamplinas

que se piensan qu´estan malus

y se crén y s´imaginan

qu´aquí estamos p´atendelus

¡porque pa eso apoquinan!

Pero andate con cuidiao y bien atento

qu´en l´esquina

anda “la oscura” esperando

pa ganalte una partía

que hoy a mi no m´a ganao

y ella d´eso no s´olvía.

A mis compañeros de Urgencias.

(Diciembre, 2004)

Dr. Francisco Corcho